Po planifikoni një udhëtim në vjeshtë? Shqipëria në vjeshtë 2025 është një nga zgjedhjet më të bukura dhe më pak të zbuluara në Europë. Kjo stinë e ngrohtë dhe e qetë sjell peizazhe mahnitëse me ngjyra të arta, temperatura të buta, çmime më të lira dhe më pak turistë. Nga Alpet e egra e deri në liqenet e qetë, nga qytetet historike te fshatrat plot traditë, Shqipëria ofron destinacione që në vjeshtë shndërrohen në përvoja të paharrueshme. Në këtë artikull do të zbuloni 6 nga vendet më të mrekullueshme për të vizituar në Shqipëri gjatë vjeshtës 2025, me aktivitete, ushqime lokale dhe këshilla praktike për çdo destinacion.
Thethi: Ku vjeshta vishet me ngjyra alpine
Nëse vjeshta ju frymëzon për aventura në natyrë dhe ajër të pastër malor, atëherë Thethi është destinacioni ideal. I vendosur në zemër të Alpeve Shqiptare, Thethi ofron një peizazh që duket i dalë nga një film dokumentar, male të larta, lugina të thella, ujëvara spektakolare dhe shtigje që të ftojnë të ecësh pa nxitim. Vjeshta është koha më e mirë për hiking në këtë zonë, temperaturat gjatë ditës janë të këndshme (rreth 20°C në shtator), ndërsa netët janë freskuese, ideale për një çaj mali pranë oxhakut.
Itinerari më i famshëm është padyshim Theth–Valbonë, një shteg alpin që lidh dy nga luginat më të bukura të veriut. Ky udhëtim zgjat rreth 6–7 orë dhe ofron pamje mahnitëse nga Qafa e Valbonës, me pyje që marrin ngjyrat tipike të vjeshtës. Për një përvojë më të lehtë, mund të zgjidhni një shëtitje drejt Ujëvarës së Grunasit ose të vizitoni Syrin e Kaltër të Thethit, një nga mrekullitë natyrore të Shqipërisë. Nëse shkoni deri në fshatin Ndërlysaj me makinë, rruga për në Syrin e Kaltër zgjat vetëm 45 minuta në këmbë.
Pas ditëve plot aventura, Thethi ju pret me qetësi, ngrohtësi dhe një mënyrë jetese që ju rikujton gjërat e thjeshta që vlejnë më shumë. Bujtina tradicionale, gatime bio, qetësi dhe një ndjesi shkëputjeje totale nga bota digjitale, në shumë zona nuk ka sinjal telefoni dhe WiFi është i kufizuar. Është vendi ku fjalët ndalen dhe natyra flet.
Pogradec: Qetësi pranë liqenit dhe shije vjeshte
Nëse dëshironi një atmosferë të qetë, peizazhe relaksuese dhe një prekje romantike buzë liqenit, Pogradeci është vendi i duhur për vjeshtën. I shtrirë buzë Liqenit të Ohrit, ky qytet merr një frymë tjetër pas verës, më pak turma, më shumë hapësirë për veten dhe një ritëm i ngadaltë që fton në reflektim. Temperaturat e shtatorit dhe tetorit janë ende të buta, ideale për shëtitje buzë liqenit, ecje me biçikletë apo një kafe nën shelgjet që lëshojnë gjethe mbi ujë.
Vetëm pak kilometra larg ndodhet Parku i Drilonit, një vend magjik në vjeshtë, burime të kristalta, mjellma të bardha dhe shelgje që pasqyrohen në ujë. Për një përvojë më kulturore, vizitoni fshatin Lin, ku mund të shihni mozaikë antikë dhe të shijoni pamjen e liqenit nga kodra.
Pas një dite të qetë buzë liqenit, mund të shijoni peshkun e famshëm Korani i Ohrit, një gotë verë vendase dhe pse jo, një perëndim që e bën çdo mbrëmje të ndjehet si skenë filmi. Pogradeci në vjeshtë është për ata që kërkojnë paqe, frymëzim dhe një lidhje të thjeshtë me natyrën.
Korçë: Serenata, birra dhe festat e fundverës
Korça është një ndër qytetet që vjeshtën e shndërron në një festë për të gjitha shqisat. E njohur si “qyteti i serenatave”, ajo kombinon pasurinë kulturore me një atmosferë të ngrohtë dhe romantike, ideale për muajt e freskët të vjeshtës. Edhe pse Festa e Birrës përfundon në gusht, qyteti mbetet plot gjallëri gjatë shtatorit dhe tetorit, me koncerte, lokale plot jetë dhe mot ideal për shëtitje. Temperaturat e ditës rrinë rreth 22–27°C në shtator, ndërsa netët freskohen, mjafton një xhaketë e lehtë për t’u ndjerë rehat.
Një nga ngjarjet më emocionuese që po merr famë është Festivali Ndërkombëtar i Serenatave Korçare, që zakonisht mbahet më 19-20 shtator te Pazari i Vjetër. Tingujt e kitarës, zërat romantikë dhe rrugicat me kalldrëm krijojnë një atmosferë unike që të kthen pas në kohë. Kjo është një përvojë që prek shpirtin, ideale për çifte, dashamirës të muzikës dhe ata që kërkojnë diçka autentike.
Përveç aktiviteteve, Korça është fantastike për ushqim e kulturë: provoni lakrorin korçar, një byrek i veçantë me dy petë, dhe shijoni një birrë vendase në një lokal me muzikë live. Nëse doni të zgjasni udhëtimin, kombinoni qëndrimin me një vizitë në Dardhë apo Voskopojë fshatra të afërt që në vjeshtë janë thjesht mahnitës.
Berat: Vjelja e rrushit dhe aroma e historisë
Nëse doni të përjetoni vjeshtën me të gjitha shqisat, Berati është një destinacion që nuk duhet humbur. I njohur për arkitekturën karakteristike dhe atmosferën historike, ky qytet i UNESCO-s bëhet edhe më i veçantë gjatë muajve shtator dhe tetor. Vjeshta është sezoni i vjeljes së rrushit dhe zona përreth Beratit, si Roshniku apo Pobrati kthehet në skenë festash tradicionale ku mund të merrni pjesë në vjeljen e rrushit, të shijoni verërat artizanale dhe të mësoni nga afër procesin e prodhimit.
Në mesin e shtatorit organizohet Festa e Roshnikut, një ngjarje që bashkon muzikën popullore, gatimet lokale dhe verën e re. Kantina të mirënjohura si Cobo, Nurellari dhe Luani ofrojnë ture, degustime dhe eksperienca që do t’ju lënë me shije të paharrueshme. Ju mund të shkelni rrushin si dikur, të provoni lëngun e parë të sezonit (“uji i bilbilit”) dhe të relaksoheni në një nga bujtinat tradicionale me oborre të mbuluar nga hardhitë.
Berati nuk është vetëm për verëdashësit është edhe për ata që duan të humbin në rrugicat me kalldrëm të lagjes Mangalem, të vizitojnë Kalanë e lashtë apo të përjetojnë qetësinë e Muzeut Onufri. Gjatë vjeshtës, muret e bardha të shtëpive marrin një ngjyrë të artë nga drita e butë e diellit, ndërsa aroma e glikosë së arrës ose fiqve të tharë përhapet nga tregjet lokale. Ky është Berati në vjeshtë, një përzierje e shijes, historisë dhe shpirtit shqiptar.
Lepusha: Ngjyrat më të egra të vjeshtës në Alpet shqiptare
E fshehur mes majave të larta të Alpeve Shqiptare, fshati Lepushë është një perlë natyrore që në vjeshtë shkëlqen me një intensitet mahnitës. Me luginat e mbushura me pyje të ahut dhe panjës, që ngjyrosen me tone të kuqe, portokalli dhe ari, ky vend i vogël është një destinacion ideal për ata që kërkojnë qetësi, autenticitet dhe bukuri të paprekur.
Në shtator dhe tetor, Lepusha është si një pikturë që ndryshon çdo ditë. Rrugët e ngushta që të çojnë drejt fshatit kalojnë përmes peizazheve dramatike me male të mprehta dhe lugina të thella, ndërsa ajri është i freskët dhe i pastër. Gjatë ditës temperaturat janë të këndshme për ecje (14–18°C), ndërsa në mbrëmje freskohet ndjeshëm, ideale për t’u ngrohur pranë oxhakut në një bujtinë tradicionale.
Fshati është gjithashtu pikënisje për ecje drejt Bjeshkëve të Namuna, Qafës së Borit apo luginës së Gerbajës. Udhëtarët më aventurierë mund të ndjekin itinerarin klasik Lepushë–Vuthaj për një eksperiencë ndërkufitare mes Shqipërisë dhe Malit të Zi. Por edhe ata që duan vetëm të shijojnë pamjet, ushqimin tradicional dhe heshtjen e thellë malore, do ta gjejnë Lepushën si një strehë ideale në këtë stinë.
Gjirokastra – Qyteti i Gurit në Dritën e Vjeshtës
Gjirokastra, qyteti muze i mbrojtur nga UNESCO, një nga vendet që fiton edhe më shumë bukuri në vjeshtë. Ndërsa rrezet e buta të diellit zbresin mbi çatitë me gurë të rrugicave të pjerrëta dhe gjelbërimi i kodrave përreth fillon të zbehet, qyteti merr një pamje magjepsëse që të fton për ta eksploruar në qetësi.
Vjeshta është koha më e mirë për të vizituar Gjirokastrën në paqe, rrugicat e kalldrëmta nuk janë të mbushura me turistë, muzetë janë më të qetë dhe qyteti frymon më natyrshëm. Vizitoni Kalatë e Gjirokastrës në mëngjes, kur drita e stinës krijon një sfond fotografik të jashtëzakonshëm mbi luginën e Drinos. Muzeu Etnografik, që ndodhet në shtëpinë ku ka lindur Enver Hoxha, ofron një udhëtim në jetën e familjeve të pasura të shekullit XIX.
Përjetimi i Gjirokastrës në këtë sezon nuk do të ishte i plotë pa ndalur për një drekë tradicionale në një nga shtëpitë karakteristike. Gatimet si pasha qofte, oshmari apo qifqitë (toptha orizi) marrin një tjetër shije kur shërbehen me verë të kuqe vendase në një verandë me pamje nga qyteti. Netët e freskëta të tetorit janë perfekte për një shëtitje në lagjen Palorto, ku ndriçimi i butë e bëjnë arkitekturën edhe më të gjallë.
Nëse vizitoni në fund të shtatorit apo tetor, informohuni për eventet lokale, ndonjëherë organizohen koncerte të vogla folklorike apo ekspozita artizanale në Kala. Gjirokastra, me historinë e saj të pasur dhe ritmin e ngadaltë, është vendi ideal për ata që duan të përjetojnë një vjeshtë kulturore dhe poetike në Shqipëri.
Pyetje të shpeshta (FAQ)
- A është Shqipëria një destinacion i mirë për të udhëtuar në vjeshtë?
Po! Shqipëria ofron mot të butë, më pak turistë, çmime të përballueshme dhe shumë aktivitete kulturore e natyrore gjatë vjeshtës. Është një stinë ideale për eksplorim autentik. - Cilat janë vendet më të mira për të vizituar në Shqipëri gjatë vjeshtës?
Korça, Dardha, Thethi, Pogradeci dhe Berati janë ndër destinacionet më të rekomanduara për këtë sezon, për shkak të klimës së favorshme, bukurisë natyrore dhe ngjarjeve unike që ofrojnë. - A është e nevojshme një guidë për të vizituar këto vende?
Jo domosdoshmërisht. Shumica e vendeve janë të aksesueshme dhe ofrojnë informacion të bollshëm për turistët. Megjithatë, një guidë lokale mund ta bëjë përvojën më të pasur, sidomos në destinacione si Thethi apo kantinat e Beratit. - Si është situata me transportin dhe akomodimin në vjeshtë?
Gjatë vjeshtës, kërkesa është më e ulët se në verë, prandaj do të gjeni më shumë opsione dhe çmime më të mira për akomodim. Transporti është më i qetë, por në zona malore si Thethi rekomandohet planifikimi paraprak.
Vjeshta është për të dashuruar Shqipërinë… dhe për ta ndarë me të tjerët
Shqipëria në vjeshtë është një thesar që ende nuk e kanë zbuluar të gjithë. Me motin e butë, çmimet e arsyeshme dhe peizazhet që ndryshojnë çdo ditë, kjo stinë i jep udhëtimit tuaj një thellësi të veçantë. Qoftë mes maleve të Thethit, rrugicave me kalldrëm në Berat, në një bujtinë në Dardhë apo buzë liqenit në Pogradec, kudo do të ndjeni atë ndjesinë e vërtetë të Shqipërisë, larg klisheve dhe pranë autenticitetit.
Nëse ky udhëzim ju frymëzoi për të planifikuar një arratisje vjeshtore, ndajeni artikullin me miqtë tuaj që kanë nevojë për pak pushim, pak natyrë dhe shumë përjetime. #LoveAlbania 🍁
